१९ माघ, काठमाडौं । नेपाल आयल निगमले खाना पकाउने ग्यासको मूल्य बढाएको छ । निगम व्यवस्थापन समितिको आज बसेको बैठकले प्रतिसिलिण्डर २५ रुपैयाँ मूल्य बढाउने निर्णय गरेकाे निगमका प्रवक्ता भानु खनालले जानकारी दिए ।

‘आइओसीले पठाएको नयाँ मूल्य बढेर आएको र निगमलाई धेरै घाटा भएकाले मूल्य बढाइएको हो , खनालले भने, यसअघि प्रतिसिलिण्डर ७८ रुपैयाँ २४ पैसा घाटा थियो, अहिले मूल्य बढाउँदा पनि प्रति सिलिण्डर १ सय ६२ रुपैयाँ ९१ पैसा घाटा छ ।’

मूल्य बढेपछि एक सिलिण्डर ग्यासको मूल्य १ हजार ३ सय २५ रुपैयाँ रहेकोमा अब १ हजार ३ सय ५० रुपैयाँ पुगेको छ । बढेको मूल्य आज राति १२ बजेदेखि लागू हुने प्रवक्ता खनालले बताए ।

निगमलाई डिजेलमा पनि प्रतिलिटर ३ रुपैयाँ १७ पैसा घाटा रहेको उनले जानकारी दिए । डिजेल र पेट्रोलको मूल्य भने यथावत राखिएको निगमले जनाएको छ ।